Ný heimasíða Víkings Ólafsvík er www.vikingurol.is 

Ef þú átt í vandræðum með að komast inn á nýju síðuna vinsamlegast hafðu samband með því að senda tölvupóst á vikingurol@gmail.com 

Brynjar Kristmundsson leikmaður Víkings Ólafsvik var í dag valinn í æfingahóp U-21 landsliðs Íslands í knattspyrnu sem mun æfa í Kórnum næstkomandi sunnudag. 

Brynjar mun þ.a.l. ekki vera með Víkingum sem keppa í futsal sama dag en þá mun seinni umferð hraðmótsins fara fram í Árbænum. Brynjar var heldur ekki með þegar leikið var í Ólafsvík fyrir rétt rúmum tveimur vikum af sömu sökum. 

Mótið hefst klukkan 15:00 og fyrsti leikur Víkings verður gegn Stál-Úlfi klukkan 15:35 í Fylkishöllinni.  

Þróttur og Breiðablik hafa dregið sig úr Futsalkeppninni en þau áttu að leika á Ólafsvík á sunnudaginn.

Af þeim sökum verður mótinu frestað en ákvörðun um framhaldið verður tekin af KSÍ í samráði við félögin eftir helgi.

Vinsamlegast látið þessar fregnir berast. 

Stofnfundur meistaraflokks kvenna á Snæfellsnesi var haldinn í íþróttahúsi Snæfellsbæjar í gær mánudaginn 19. nóvember. Alls mættu rúmlega 20 manns á fundinn, leikmenn, stjórn og áhugafólk um kvennaknattspyrnu á Snæfellsnesi. Stjórnina skipa Sveinn Þór Elinbergsson formaður, Kristinn Jónasson, Jónas Gestur Jónasson og Elínrós Jónsdóttir gjaldkeri.  Gunnar Örn Arnarson, framkvæmdarstjóri meistaraflokks karla VíkingsÓ, gegnir einnig því hlutverki í hinum nýstofnaða meistaraflokki kvenna.

Á fundinum var farið yfir grundvöll og markmið með stofnun meistaraflokks kvenna og þjálfari kynntur til sögunnar. Björn Sólmar Valgeirsson mun gegna stöðu þjálfara en hann þjálfar nú þegar lungað úr hópnum sem kemur til með að spila með liðinu. Stuttlega var farið yfir samningsmál auk þess sem málefnalegar umræður voru um hvað nafn liðið muni bera. Var það einróma álit fundarmeðlima að nota skyldi  nafn Víkings.

Um næstkomandi helgi taka stelpurnar þátt í futsal-móti sem haldið verður í Ólafsvík þar sem liðið etur kappi við Breiðablik, Val og Þrótt R.  Í kjölfarið verður gengið frá samningum við leikmenn auk þess sem æfingum verður fjölgað.

Við undirritun leikmannasamninga gefst kjörið tækifæri til myndatöku af hópnum.

Víkingar fóru vel af stað í Íslandsmótinu í Futsal en fyrri umferð riðlakeppninnar var leikin í Ólafsvík um helgina. Mótið var með svokölluðu hraðmótasniði þar sem hvert lið í riðlinum lék þrjá leiki með stuttu millibili. Liðin sem voru skráð til leiks voru Stál-Úlfur, Fylkir, Grundarfjörður og Víkingur Ólafsvík. 

Það er skemmst frá því að segja að Víkingar unnu alla sína leiki. Fyrsti leikur mótsins var gegn Stál-Úlfi þar sem lokatölur urðu 5-1. Mörk Víkings gerðu Guðmundur Magnússon (2), Guðmundu Steinn Hafsteinsson, Damir Muminovic og Heimir Þór Ásgeirsson. Næsti leikur var gegn Grundarfirði þar sem Víkingur hafði betur 6-3. Mörk Víkings gerðu Eyþór Helgi Birgisson, Heimir Þór Ásgeirsson, Guðmundur Magnússon, Steinar Már Ragnarsson (2) og svo varð Vignir Stefánsson fyrir því óláni að skora sjálfsmark. 

Síðasti leikur mótsins var gegn Fylkismönnum og úr varð nokkurskonar úrslitaleikur í mótinu því bæði lið höfðu unnið 2 leiki hvort. Víkingar voru mun sterkari í fyrri hálfleik og hefðu hæglega getað skorað 4 mörk í fyrri hálfleik. Víkingar fóru hins vegar tveggja marka forystu í leikhlé með mörkum frá Guðmundi Steini og Tomasz Luba. Fylkismenn sóttu í sig veðrið þegar líða tók á leikinn og náðu að minnka muninn í 2-1 og þar við sat. Guðmundur Magnússon hefði getað gulltryggt sigurinn undir lok leiksins en mistókst að vippa yfir Bjarna Þórð í marki Fylkis. Víkingar fara því með fullt hús stiga í seinni umferð riðlakeppninnar sem haldin verður í Fylkishöll 2. desember næstkomandi.
 

Forráðamenn Víkings Ólafsvík eru mættir í höfuðsöðvar KSÍ á formanna- og framkvæmdastjórafund.

Hægt verður að fylgjast með hérna á síðunni þegar dregið verður í töfluröð fyrir sumarið 2013. Einngi verður hægt að fylgjast með á twittersíðu félagsins.

Áætlað er að drátturinn hefjist klukkan 14:15

#Vikingurol

Hér má sjá beinalýsingu frá drættinum í töfluröð í Pepsi Deildinni 2013

14:33 Aðeins verður dregið í fyrstu umferð til að byrja með. Nú tekur veið tölvuforrit sem sér um að raða umferðum 2-22. Niðurstöður birtar um leið og þær berast

14:00 Birkir mótastjóri ætlar að byrja á 3.deild, svo 2. deild, 1. deild, pepsideild kvk og svo pepsi kk #Vikingurol

1. umferð
Víkingur Ó - Fram
ÍBV - ÍA
Breiðablik - Þór
FH - Keflavík
KR -  Stjarnan
Fylkir Valur

2. umferð
Stjarnan - Víkingur Ó. 

3. umferð
Víkingur Ó. - Keflavík 

4. umferð
Þór - Víkingur Ó. 

5. umferð
Víkingur Ó. - ÍBV 

6. umferð
Breiðablik - Víkingur Ó.  

7. umferð
Víkingur Ó. - FH 

8. umferð
KR - Víkingur Ó. 

9. umferð
Víkingur Ó. - íA 

10. umferð
Víkingur Ó. - Fylkir 

11. umferð
Valur - Víkingur Ó 

12. umferð
Fram - Víkingur Ó.  
13. umferð
Víkingur Ó. - Stjarnan 

14. umferð
Keflavík - Víkingur Ó.

15. umferð
Víkingur Ó. - Þór
16. umferð
ÍBV - Víkingur Ó.  

17. umferð
Víkingur Ó. - Breiðablik 

18. umferð
FH - Víkingur Ó.  

19. umferð
 Víkingur Ó. - KR

20. umferð
ÍA - Víkingur Ó.  

21. umferð
Fylkir - Víkingur Ó. 

22. umferð
Víkingur Ó. - Valur

Brynjar Kristmundsson skrifaði í dag undir tveggja ára samning við Víking Ólafsvík. Brynjar er félaginu góðu kunnur enda á hann að baki yfir 100 leiki með liðinu. Brynjar fór að láni til Vals sumarið 2011 þar sem hann kom við sögu í 7 leikjum í efstu deild. Síðastliðið tímabil lék hann svo 8 leiki með Hlíðarendafélaginu áður en hann sneri aftur til Ólafsvíkur.

Brynjar hóf meistaraflokksferil sinn árið 2007 þar sem hann kom við sögu í 7 leikjum í 1. Deild. Alls hefur hann skorað 6 mörk, 4 í fyrstu deild (öll sumarið 2009), eitt í 2. deild og eitt í bikarkeppni KSÍ, stórglæsilegt mark beint úr aukaspyrnu gegn liðinu sem hann svo síðar gekk til liðs við.

Vikingurol.is setti sig í samband við kappann og smellti nokkrum laufléttum spurningum á hann í tilefni undirskriftarinnar.

Hvernig er að vera kominn heim? „Það er mjög ánægjulegt að vera kominn aftur heim. Það eru spennandi verkefni framundan hjá Víking og er ég virkilega spenntur að byrja að takast á við þau.“

Þú varst í um ár fyrir sunnan, hvað varð til þess að þú ákvaðst að koma heim í sumar og svo alfarið núna? „Vera mín hjá Val gekk ekki eins og ég hafði ætlað mér. Ég lenti í erfiðum meiðslum síðasta vetur sem fylgdu mér inn í sumarið og í kjölfarið átti ég erfitt uppdráttar. Ástæðan fyrir því að ég kem aftur til Víkings er að reyna að ná grunninum aftur upp með þjálfara sem ég þekki vel og veit hversu góður er. Það skiptir mig miklu máli að vera á stað þar sem ég veit að mér líður vel og að vera í umhverfi þar sem ég veit að ég get bætt mig sem leikmann.“ 

Telur að reynsla þín í efstu deild muni hjálpa liðinu næsta sumar? „Ég mun alltaf reyna að hjálpa liðinu á einhvern hátt og vona ég að ég geti miðlað einhverri reynslu til annarra leikmanna.“

Æfingarnar hefjast formlega í þessari viku, hvernig leggst undirbúningstímabilið í þig? „Undirbúningstímabilið leggst mjög vel í mig. Það er alltaf gaman að byrja aftur eftir gott frí og ég í raun ekki beðið eftir því að byrja að æfa með strákunum.“

Það styttist í að Futsal-keppnin hefjist, er það ekki ágætis tilbreyting frá hinum hefðbundna fótbolta? „Jú mér finnst það, þetta er nánast allt önnur íþrótt en maður getur tekið mjög mikið með sér frá futsalinu yfir í hefðbundinn fótbolta.“

Liðinu hefur gengið mjög vel í þessu móti undanfarin tvö ár og tvívegis tekist að komast í úrslitaleikinn, hafið þið sett einhver markmið hvað það varðar? „Það hefur svosem ekkert verið rætt. En menn tala alltaf um að reyna að gera betur en árið áður (innskot fréttaritara: sem var því miður silfrið). Við munum klárlega reyna að gera okkar besta til að ná eins langt og mögulegt er."

Vikingurol.is vill að endingu bjóða Brynjar hjartanlega velkominn heim og hlakkar til að fylgjast með framgangi hans á komandi sumri.  

Myndir: Þorsteinn Ólafs & Þröstur Albertsson 

Damir Muminovic samdi í gær við Víking Ólafsvík til tveggja ára. Damir sem er 22 ára gamall er að upplagi HK-ingur en lék með Leiknismönnum á nýafstaðinni leiktíð. Hann á að baki 94 leiki með meistaraflokk þar sem hann hefur skorað 6 mörk, 2 með Leikni og 4 með Ými í 3 deild.

Damir getur bæði spilað sem afturliggjandi miðjumaður og miðvörður. Í Víking hittir Damir fyrir gamlan liðsfélaga Eyþór Helga Birgisson, en þeir léku saman með HK árið 2011.

Víkingurol.is setti sig í samband við Damir og smellti á hann nokkrum spurningum.

Hvers vegna ákvaðstu að ganga í raðir VÓ á þessum tímapunkti? Víkingur er klúbbur á uppleið með frábæran þjálfara og leikmenn. Það var ekki spurning um að ganga til liðs við Víking þegar að ég heyrði að Ejub hafði áhuga á að fá mig.

Hvað var það sem heillaði mest? Frábær þjálfari og metnaður sem að liðið hefur.

Hvernig líst þér á aðstæður í Ólafsvík? Þær eru góðar hef ég heyrt, hef því miður ekki skoðað þær en hef spilað þar og það var góð stemmning.

Hverja telur þú möguleika liðsins vera næsta sumar? Við verðum bara að bíða og sjá hvað gerist. Ætli það séu ekki margir sem að spá okkur falli strax, en ég held að með þetta lið sem að við erum með, getum við gert góða hluti.

Hlakkar þér ekki til að koma vestur og anda að þér fersku sjávarloftinu? Já að sjálfsögðu,verður ef til vill pínu öðruvísi fyrir mig þar sem ég hef einungis búið í höfuðborginni. En hlakka samt sem áður til. 

Mynd (Damir í baráttunni við Steinar í sumar): Þröstur Albertsson